நாட்டின் முக்கிய பொறுப்புகளில் இருந்த தம்மை போன்ற பலரை பழிவாங்கியமையினாலேயே முன்னாள் ஜனாதிபதி மஹிந்த ராஜபக்ஷ இன்று அரசியல் களத்தில் அநாதையாகியுள்ளதாக ஜனநாயக கட்சியின் தலைவர் பீல்ட் மார்ஷல் சரத் பொன்சேகா தெரிவித்தார்.
சர்வதேச தொழிலாளர் தினத்தை முன்னிட்டு ஊழல் இல்லா நாடு என்ற தொனிப்பொருளில் ஜனநாயக கட்சியின் மேதின பொதுக்கூட்டம் நேற்று நாரஹேன்பிட்டி ஷாலிகா மைதானத்தில் இடம் பெற்றது. இந்நிகழ்வில் பங்கேற்று உரையாற்றும்போதே அவர் மேற்கண்டவாறு தெரிவித்தார்.
நிகழ்வின் ஆரம்ப கட்டமாக கொழும்பு ராஜகிரிய சந்தியிலிருருந்து முன்னெடுக்கப்பட்ட பேரணி பொரளை ஊடாக நாரஹேன்பிட்டி மைதானத்தை வந்தடைந்தது.
பேரணியில் நூற்றுக்கணக்கானோர் கலந்து கொண்டதுடன் ஊழல் இல்லாத நாடு வேண்டும், மக்களை ஏமாற்றாத ஆட்சியாளர்கள் வேண்டும் என்றவாறு கோஷங்கள் எழுப்பப்பட்டன.
இதன்போது பேரணியில் ஜனநாயக கட்சியின் தலைவர் பீல்ட் மார்ஷல் சரத் பொன்சேகா, அவரது பாரியார் அனோமா பொன்சேகா உட்பட கட்சியின் முக்கியஸ்தர்கள் பலரும் கலந்து கொண்டிருந்தனர்.
இதன் போது தொடர்ந்தும் உரையாற்றிய சரத் பொன்சேகா, முன்பு நான் 3 முறை யுத்த பூமியில் தாக்குதலுக்கு இலக்கான போதிலும் மீண்டும் என்னை தயார் படுத்தி கொண்டு யுத்தத்திற்கு சென்றேன். ஆனால் எதிர்பாராத விதத்தில் நான் அரசியல் பழிவாங்கல்களுக்கு உள்ளான போது தான் புரிந்தது. யுத்த வெற்றியை அடைய முடியாது நீண்ட காலம் தடுத்தவர் மஹிந்தவென்று.
அவ்வாறு தெரிந்த போது யுத்தம்நிறைவடைந்தது. நான் சிறையில் அடைக்கப்பட்டேன். அன்று அமைதியாக இருக்க வேண்டிய நிலை ஏற்பட்டது. ஆனால் இன்று என்நிலை கண்டால் மஹிந்தவுக்கு மூச்சுத்திணறக் கூடும்.
நான் மட்டுமல்ல, நாட்டிற்காக உழைத்த பல முக்கியஸ்தர்கள் பழிவாங்கப்பட்டனர். அதனால் தான் இன்று மஹிந்தவுக்கு அரசியல் களத்தில் அநாதையாக வேண்டிய நிலை ஏற்பட்டுள்ளது. மஹிந்தவின் எண்ணங்கள் பல இன்று நிறைவேறாது போயுள்ளன. அவர் எதிர்பார்த்த மோசமானதொரு ஆட்சிக்கு மாறானதொரு ஆட்சியே இன்று இடம் பெறுவதால் அதனை கண்டு மஹிந்த நோயாளியாக மாறியுள்ளார்.
முன்பு மஹிந்தவின் கோரிக்கை களுக்கு நான் இணங்காத காரணத்தினால் ராவணா பலய அமைப்பினை கொண்டு என்னை மிரட்டிய மஹிந்தவோடு முரண்படுவது மலையொன்றில் தலையை தானே முட்டிக் கொள்வது போன்று இருந்தது. ஆனால் இன்று நான் விஸ்வரூபம் எடுத்துள்ளதால் மஹிந்த எனக்கு எறும்புக்கு நிகரான உருவமாக விளங்குகிறார் என்றார்.