ஐக்கிய நாடுகளுக்கான அமெரிக்க தூது வர் சமந்தா பவர் இன்று பிற்பகல் இலங்கை கட்டுநாயக்க விமான நிலையத்தை வந்தடைந்தார்.
டெல்லியில் இருந்து இலங்கைக்கு வந்த இந்திய விமானச் சேவைக்கு சொந்தமான யுஐ 281 என்ற விமானத்தில் 8 பிரதிநிதிகளுடன் வருகைத் தந்தார்.
சமந்தா பவர் நாளை நண்பகல் கொழும்பில் அமைந்துள்ள அமெரிக்க தூதுவரின் இல்லத்தில் தமிழ்த்தேசியக் கூட்டமைப்பினருடன் முக் கிய பேச்சுவார்த்தையொன்றில் கலந்துகொள்ளவுள்ளார்.
இலங்கைக்கான அமெரிக்க தூதுவர் அப்துல் கெசாப் உள்ளிட்ட முக்கிய அதிகாரிகளும் கலந்து கொள்ளவுள்ளதோடு தமிழ்த் தேசியக் கூட்டமைப்பின் தலைவரும் எதிர்க்கட்சித்தலைவருமான இரா.சம்பந்தன் தலைமையில் பாராளுமன்ற குழுக்களின் பிரதித்தலைவரும் பாராளுமன்ற உறுப்பினருமான செல்வம் அடைக்
கலநாதன், தமிழரசுக்கட்சியின் தலைவரும் பாராளுமன்ற உறுப்பினருமான மாவை.சேனாதிராஜா, புளொட்தலைவரும் பாராளுமன்ற உறுப்பினருமான த.சித்தார்த்தன், ஈ.பி.ஆர்.எல்.எப் தலைவர் சுரோஷ்பிரேமச்சந்திரன், கூட்டமைப்பின் பாராளுமன்ற குழுக்களின் பேச்சாளரும் யாழ்.மாவட்ட பாராளுமன்ற உறுப்பினருமான எம்.ஏ.சுமந்திரன் ஆகியோர் இந்த சந்திப்பில் பங்கேற்கவுள்ளனர்.
இலங்கைக்கு விஜயம் செய்துள்ள ஐக்கிய நாடுகளுக்கான அமெரிக்க தூதுவர் சமந்தா பவர் நாளை வடக்கிற்கான விஜயத்தை மேற்கொள்ளவுள்ளார். இதன்போது வடமாகாண முதலமைச்சர் சி.வி.விக்கினேஷ்வரனை சந்திக்கவுள்ளதோடு மோதல்களினால் பாதிக்கப்பட்டோர், உள்ளுர் அரசாங்க அதிகாரிகள், சிவில் அமைப்புக்களின் பிரதிநிதிகள் ஆகியோருடன் கலந்துரையாடவுள்ளார். அத்துடன் ஒஸ்மானியா கல்லூரியின் புதிய கட்டிட திறப்பு விழாவிலும் கலந்துகொள்ளும் இவர் யாழ்ப்பாண நூலகத்திற்கும் உத்தியோக பூர்வ விஜயத்தை மேற்கொள்ளவுள்ளார்.
அதனைத்தொடர்ந்து திங்கட்கிழமையன்று ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க, வெளிவவிவகார அமைச்சர் மங்களசமரவீர உள்ளிட்ட அரசாங்கத்தின் முக்கிய பிரதிநிதிகளையும் சமந்தா பவர் சந்தித்து பேச்சுவார்த்தை நடத்தவுள்ளார்.
அண்மைய நாட்களாக ஆசிய நாடுகளுகான விஜயத்தை மேற்கொண்டிருக்கும் ஐக்கிய நாடுகளுக்கான அமெரிக்க தூதுவர் சமந்தா பவர் இந்த இலங்கை விஜயத்தின்போது இங்கு நான்கு நாட்கள் தங்கியிருக்கவுள்ளார். இத்தருணத்தில் இருநாடுகளுக்கும் இடையிலான இருதரப்பு உறவை வலுப்படுத்த அமெரிக்கா கொண்டிருக்கும் ஈடுபாடு தொடர்பாக வலியுறுத்தவுள்ளதோடு, சமாதானம், பொறுப்புகூறுதல், நல்லிணக்கம் ஆகிய முயற்சிகளுக்கான அமெரிக்காவின் ஆதவை வெளிப்படுத்தும் வகையில் அரச உயரதிகாரிகள், சமூகத் தலைவர்கள், சிவில் சமூகக் குழுக்கள், இளைஞர்கள் ஆகியோருடன் சந்திப்புக்களை மேற்கொள்ளவுள்ளமை குறிப்பித்தக்கது.