எதிர்வரும் பொதுத்தேர்தலில் மஹிந்த ராஜபக் ஷவை பிரதமர் வேட்பாளராகக் களமிறக்கினால் ஸ்ரீலங்கா சுதந்திரக்கட்சி தோற்றுப்போகும். தமிழ், முஸ்லிம் மக்களின் வாக்குகள் மஹிந்தவுக்குக் கிடைக்காது.
பொதுத்தேர்தலில் வெற்றிபெறுவதற்கு தமிழ், முஸ்லிம் மக்களின் ஆதரவை திரட்டிக் கொள்ள வேண்டும் என கிராமிய பொருளாதார அபிவிருத்தி அமைச்சர் எஸ்.பி. திசாநாயக்க தெரிவித்தார்.
கொழும்பிலுள்ள ஸ்ரீலங்கா சுதந்திரக்கட்சியின் தலைமைக்காரியாலயத்தில் நேற்றுக்காலை நடைபெற்ற செய்தியாளர் சந்திப்பில் கலந்து கொண்டு உரையாற்றுகையிலயே அவர் மேற்கண்டவாறு கூறினார். தொடர்ந்து அவர் உரையாற்றுகையில் தெரிவித்தாவது, எதிர்வரும் பொதுத்தேர்தலில் மஹிந்த ராஜபக்ஸவை பிரதமர் அபேட்சகராக களமிறக்கக் கூடாது என்பதே எனது தனிப்பட்ட அபிப்பிராயமாகும். மஹிந்த ராஜபக்ஸவோ அல்லது ஜனாதிபதி மைத்திரிபால சிறிசேனவோ ஸ்ரீலங்கா சுதந்திக்கட்சியை ஒரு போதும் பிளவுபடுத்த மாட்டார்கள். கட்சியின் ஆதரவாளர்களை அவர்கள் நடுத்தெருவில் விட்டு விடமாட்டார்கள்.
மஹிந்தவும் மைத்திரிபாலவும் ஸ்ரீலங்கா சுதந்திரக்கட்சிக்கு அத்தியாவசியமானவர்கள்.பொதுத்தேர்தல் பிரசாரங்களுக்கு மஹிந்த ராஜபக்ஸ அவசியம் தேவைப்படுபவராவார்.
கடந்த ஜனாதிபதித்தேர்தலில் சிறுபான்மையினரின் வாக்குகள் இழக்கப்பட்டமையே தோல்விக்குக் காரணம். கடந்த ஜனாதிபதித் தேர்தலில் முஸ்லிம்கள் மஹிந்தவைத்தோற்கடிக்க வேண்டுமென்பதற்காக ஆர்வமுடன் வாக்களித்தார்கள். எப்போதும் தேர்தல்களில் முஸ்லிம்களின் வாக்களிப்பு வீதம் 60 ஆகவே இருக்கும். ஆனால் கடந்த ஜனாதிபதித்தேர்தலில் 80 வீதமான முஸ்லிம்கள் தமது வாக்குகளைப் பயன்படுத்தினார்கள்.
எனவே எதிர்வரும் பொதுத்தேர்தலில் ஐக்கிய மக்கள் சுதந்திர கூட்டமைப்பும், ஸ்ரீலங்கா சுதந்திரக்கட்சியும் சிறுபான்மை மக்களையும், சிறுபான்மைக் கட்சிகளையும் ஒன்றிணைத்துக்கொண்டே தேர்தலில் களமிறங்கவுள்ளது என்றார்.