மக்களின் ஆதரவிருக்கும் மஹிந்தவை இணைத்துக் கொண்டு நாட்டில் மீண்டும் சுதந்திரக்கட்சி தலைமையிலான அரசாங்கத்தை ஏற்படுத்துவோம். ஐ.தே. கட்சியை வீட்டுக்கு அனுப்புவோம் என எதிர்க்கட்சியின் பிரதம கொறடாவும் எம்.பி.யுமான ஜோன் செனவிரத்ன தெரிவித்தார்.
ஜே.வி.பி. யின் ”மணி” இன்று யானையின் கழுத்தில் கட்டப்பட்டு அடிமையாகி விட்டது என்றும் அவர் குறிப்பிட்டார்.
இது தொடர்பாக ஜோன் செனவிரத்ன எம்.பி. மேலும் தெரிவிக்கையில்,
ஸ்ரீலங்கா சுதந்திரக் கட்சிக்குள் பிரச்சினைகள் முரண்பாடுகள் தலைதூக்கியுள்ளன. அதனை எமது கட்சிக்குள் பேச்சுவார்த்தைகளை நடத்தி சுமுகமாக தீர்த்துக் கொள்வோம்.
அது தொடர்பில் வேறு கட்சிக்காரர்கள் கவலைப்பட வேண்டிய அவசியமில்லை. ஐ.தே. கட்சிக்குள் 20 வருடங்களுக்கு மேலாக பல பிரச்சினைகள் காணப்பட்டன.
கட்சித் தலைவருக்கு எதிராக பகிரங்கமாக போர்க்கொடி உயர்த்தினார்கள். இன்றும் ஐ.தே.கட்சிக்குள் முரண்பாடுகள் புகைந்து கொண்டுதான் இருக்கின்றன.
ஜே.வி.பி. க்குள்ளும் பிரச்சினைகள் தலைதூக்கியுள்ளன. முன்னாள் தலைவரும் கட்சி ஆலோசகரும் கட்சியை விட்டு வெளியேறி ஜே.வி.பி. யை கடுமையாக விமர்சிக்கின்றார். ஜே.வி.பி.யின் மணி இன்று யானையின் கழுத்தில் கட்டப்பட்டுள்ளது.
இவ்வாறானவர்கள் தான் சுதந்திரக் கட்சியை விமர்சிக்கின்றனர். நிழலைப் பார்த்து நாய் குரைப்பதால் எதுவுமே நடைபெறப் போவதில்லை. நிலவு கீழிறங்கி வரப் போவதுமில்லை.
எனவே எவரது விமர்சனத்திற்கும் நாம் கவலைப்பட போவதில்லை. முன்னாள் ஜனாதிபதி மஹிந்த ராஜபக் ஷவிற்கு இன்னமும் மக்கள் ஆதரவு உள்ளது. எனவே மஹிந்தவையும் ஜனாதிபதி மைத்திரி பால சிறிசேனவையும் இணைக்கும் முயற்சிகளை மேற்கொள்வோம்.
மஹிந்த தலைமையில் பொதுத் தேர்தலில் பிரசாரங்களை முன்னெடுத்து ஸ்ரீலங்கா சுதந்திரக் கட்சியை வெற்றி பெறச் செய்வோம்.ஸ்ரீலங்கா சுதந்திரக் கட்சி தலைமையிலான ஆட்சியை உருவாக்குவோம். இது நிச்சயம் என்றும் ஜோன் செனவிரத்ன எம்.பி. தெரிவித்தார்.