கடந்த ஞாயிற்றுக்கிழமை ஸ்ரீலங்கா முஸ்லிம் காங்கிரஸின் பேராளர் மகாநாடு கொழும்பில் நடைபெற்றது. இம்மகாநாட்டின்போது கட்சியின் உயர் பதவிகளுக்கான ஆட்கள் நியமனம் செய்யப்பட்டார்கள். இதன்போது செயலாளர் நாயகமான ஹசனலிக்கு ஏற்கனவே வாக்குறுதியளிக்கப்பட்டபடி அதிகாரம் பொருந்திய செயலாளர் பதவி வழங்கப்படாமல் மகாநாடு நடந்து முடிந்திருக்கிறது.
கட்சியின் செயலாளர் நாயகமாக ஹசனலி நீண்டகாலம் பதவி வகித்தவர். தலைவர் அஷ்ரப் காலத்திலும் ஹக்கீம் காலத்திலும் தமது தேவை கருதி கட்சியை நாடி வந்த மக்களுக்குப் பல்வேறு கடிதங்களையும் ஆவணங்களையும் இலட்சக் கணக்கில் தயாரித்து வழங்கி உதவியவர். இனப்பிரச்சினைத் தீர்வு நடவடிக்கைகளின்போதும் வெளிநாட்டிலிருந்து வருகை தரும் ஐ.நா.சபை போன்ற உயர் நிறுவனப் பிரதிநிதிகளைச் சந்திப்பதிலும் அரசாங்கத்துடனான பல்வேறு பேச்சுவார்த்தைகளில் கட்சி சார்பாகவும் கலந்து கொண்டவர். கட்சியின் ஆவணக் களஞ்சியமாக வர்ணிக்கப்பட்டவர். அஷ்ரப் இல்லாதநிலையில் கட்சியின் போராளிகள் இவரைக் கண்டதும் அஷ்ரபாக பார்ப்பதுமுண்டு.
இப்படிப்பட்ட முக்கியமான ஒருவர் தேசியப் பட்டியல் நியமனம் கேட்டார் என்ற காரணத்திற்காக பொருத்தமான பதவி வழங்கப்படாமல் கட்சியில் சாதாரண அங்கத்தவராக மாற்றப்பட்டுள்ளார்.மறைந்த தலைவர் எம்.எச்.எம்.அஷ்ரப் 1981 ஆம் ஆண்டு காத்தான்குடியில் மு.கா வை ஆரம்பித்தார். எனினும் அக்காலகட்டத்தில் கட்சி போதிய வளர்ச்சிபெற முடியாமல் கிடப்பில் போடப்பட்டிருந்தது.
இந்நிலையில் வெளிநாட்டிலிருந்து தனது தொழிலை முடித்து நாட்டுக்கு வந்த ஹசனலியும் அவருடைய நண்பரான கட்டடக் கலைஞர் எம்.ஐ.எம்.இஸ்மாயில் என்பவரும் அஷ்ரபை சந்தித்து முஸ்லிம் கட்சியொன்றின் தேவை பற்றிக் கலந்துரையாடினர். இதன் தொடர்ச்சியாக ஸ்ரீலமுகா தொடர்பான நடவடிக்கைகள் முன்னெடுக்கப்பட்டன. அன்றிலிருந்து இன்றுவரை பல்வேறு தியாகங்களுக்கு மத்தியில் ஹசனலி போராளிகளின் உதவியோடு இக்கட்சியை வளர்த்தெடுத்தார்.
இப்படிப்பட்ட ஒருவரையே அளிக்கப்பட்ட வாக்குறுதியை மீறி தேசியப்பட்டியலும் செயலாளர் பதவியும் வழங்காமல் கட்சி ஒதுக்கி வைத்துள்ளது.குர்ஆனையும் ஹதீஸையும் அடிப்படையாகக் கொண்டு இயங்கும் ஒரு கட்சி இப்படி நடந்து கொள்வது பற்றி முஸ்லிம்களுக்கு மத்தியிலும் ஏனையோருக்கிடையிலும் ஏமாற்றங்கள் வெளிப்படுத்தப்பட்டு வருகின்றன.தேசியப் பட்டியல் விடயத்தில் தனிநபர்கள் மட்டுமல்ல, பல இயக்கங்களும் கட்சிகளும் கூட முஸ்லிம் காங்கிரசினால் ஏமாற்றங்களைச் சந்தித்துள்ளன.
நல்லாட்சிக்கான தேசிய முன்னணி என்பது 2013 ஆம் ஆண்டு தொடங்கப்பட்டதும் கிழக்கு மாகாண அரசியலில் நல்லாட்சி என்ற சொல்லை முதன்முதலில் பயன்படுத்தியதுமான ஒரு அரசியல் கட்சி ஆகும். வடமாகாணசபையில் ஒரு உறுப்பினரையும் கொண்டுள்ளது.பொறியியலாளர் அப்துர் ரஹ்மான் தலைமையிலான இம்முன்னணியுடன் மட்டக்களப்பு மாவட்டத்தில் மு.கா. தேர்தல் ஒப்பந்தமொன்றைச் செய்து கொண்டு ஒரு ஆசனத்தைப் பெற்றுக் கொண்டது. மு.கா.வின் அலி சாகிர் மௌலானா உறுப்பினரானார். இந்த வெற்றியை மட்டக்களப்பில் பெற்றுக்கொள்ள முடியாமல் போயிருந்தால் மு.கா. வின் இன்றையநிலை தலைகீழாக மாறியிருக்கும்.
தேசியப்பட்டியல் எண்ணிக்கைகூட ஒன்றாகக் குறைந்திருக்கும்இப்படிப்பட்ட முக்கியமான வெற்றியைப் பெற்றுக் கொடுத்த நல்லாட்சிக்கான தேசிய முன்னணிக்கு ஒப்பந்தப்படி தேசியப் பட்டியல் வழங்காமல் மு.கா. ஏமாற்றியது. எனவே கட்சியின் செயலாளர் நாயகம் ஏமாற்றப்படுவது ஒன்றும் பெரிய விடயமல்ல. ஹசனலி தன்னிடமிருந்து பறிக்கப்பட்ட அதிகாரங்களை மீண்டும் தனக்கு வழங்கும்படி கேட்டார் என்பது அவருக்கெதிரான மற்றுமொரு குற்றச்சாட்டாகும்.
தலைவர் அஷ்ரபுக்குத் தேவைப்படாத அதிகாரம் ஹக்கீமுக்கு ஏன் இப்போது தேவைப்படுகிறது என்பதுதான் எல்லோருடையதும் கேள்வியாகும். தலைவர் அஷ்ரபுடைய காலத்தில் 23 உயர்பீட உறுப்பினர்களே இருந்தனர். தற்போது 90 இற்கும் மேற்பட்ட உறுப்பினர்களைக் கொண்டுள்ள நிலையிலும் தான் விரும்பும் விடயத்தை நிறைவேற்றிக்கொள்ள கட்சியிலும் உச்சபீடத்திலும் போதிய வசதிகள் இருக்கும் நிலையிலும் ஏன் ஹசனலியின் அதிகாரம் பறிக்கப்பட்டது என்பதுபற்றி இப்போது மக்கள் யோசிக்கத் தொடங்கியுள்ளார்கள்.
கட்சியின் மூத்த உறுப்பினர்களை ஒவ்வொருவராக வெளியேற்றும் முயற்சி படிப்படியாக நிறைவேறி வருகிறதென்று உயர்பீட உறுப்பினர்களும் இப்போது உணரத் தொடங்கியுள்ளார்கள். எஞ்சியுள்ள ஒன்றிரண்டு கிழக்கு மாகாண முக்கிய உறுப்பினர்கள் அடுத்த வெட்டு தமக்கே என்று தமது நாட்களை எண்ணத் தொடங்கியுள்ளார்கள்.அதிகாரத்தைச் சுவைத்துப் பழகியவர்கள் அந்தச் சந்தர்ப்பத்தை இழக்க விரும்ப மாட்டார்கள் என்பதற்கு பல உதாரணங்கள் உள்ளன. எப்படியும் ஜனாதிபதித் தேர்தலை வென்று விடுவார் என்று நம்பப்பட்ட மஹிந்த தோற்கடிக்கப்பட்டதும் பிரபாகரனின் கதை முடிவுக்கு வந்ததும் எல்லோருக்கும் தெரிந்த விடயமாகும்.
ஏ.பீர் முகம்மது