புனித பூமி என்ற போர்வையில் மாதம்பையில் சுவீகரிக்கப்பட்டிருக்கும் முஸ்லிம்களின் காணி உறுதிகளை பரிசீலனைக்காக மாதம்பை பிரதேச செயலாளரிடம் கையளிக்குமாறு பாரிய நகர மற்றும் மேல் மாகாண அபிவிருத்தி அமைச்சர் சம்பிக்க ரணவக்க சம்பந்தப்பட்ட குடும்பங்களைக் கோரியிருக்கிறார்.
அமைச்சர் சம்பிக்க ரணவக்கவின் உத்தரவுக்கு அமைய இன்று செவ்வாய்க்கிழமை சுவீகரிக்கப்பட்டுள்ள 24 முஸ்லிம் குடும்பங்களின் பூர்வீக காணி உறுதிகள் மாதம்பை பிரதேச செயலாளரிடம் ஒப்படைக்கப்படவுள்ளன என பாதிக்கப்பட்டவர்களின் அமைப்பின் தலைவர் எஸ்.எம். கௌஸுல் அமீர் தெரிவித்தார்.
மாதம்பையில் முஸ்லிம்கள் பூர்வீகமாக வாழ்ந்து வரும் காணி புனித பிரதேசத்துக்குட்பட்டது என அரசாங்க வர்த்தமானி மூலம் பிரசுரிக்கப்பட்டதையடுத்து அப்பிரதேசத்தில் குடியிருக்கும் முஸ்லிம்கள் இது தொடர்பில் கடந்த வாரம் பாரிய நகர் மற்றும் மேல் மாகாண அபிவிருத்தி அமைச்சர் சம்பிக்க ரணவக்கவை அவரது அமைச்சில் சந்தித்து முறையிட்டனர்.
காணியின் வரலாற்றை கேட்டறிந்த அமைச்சர் இக்காணி ஏன் சுவீகரிக்கப்பட்டது என்பதை ஆராய்ந்து பார்க்க வேண்டும். பரிசீலனை செய்து பார்க்க வேண்டும் எனத் தெரிவித்ததுடன் மாதம்பை பிரதேச செயலாளரைத் தொடர்பு கொண்டு இது தொடர்பில் பூரண அறிக்கையொன்றினைத் தனக்குச் சமர்ப்பிக்கும் படியும் வேண்டினார்.
இதனையடுத்து பிரதேச செயலாளர் பாதிக்கப்பட்டுள்ள 24 முஸ்லிம் குடும்பங்களின் காணி உறுதிகளை பரிசீலனை செய்து அமைச்சர் சம்பிக்க ரணவக்கவுக்கு அறிக்கையொன்றினைச் சமர்ப்பிக்கவுள்ளார்.
முஸ்லிம்களின் காணி உறுதிகள் எந்த அடிப்படையில் வழங்கப்பட்டுள்ளன. எத்தனை வருடங்கள் முஸ்லிம்கள் வாழ்கிறார்கள் என்னும் விபரங்கள் திரட்டப்பட்டு அறிக்கை சமர்ப்பிக்கப்படவுள்ளது.
பிரதேச செயலாளரினால் சமர்ப்பிக்கப்படும் அறிக்கையின் பிரதியொன்றினை பாதிக்கப்பட்டுள்ள முஸ்லிம்களுக்கும் வழங்குமாறு அமைச்சர் பிரதேச செயலாளருக்கு உத்தரவிட்டுள்ளார்.
பாதிக்கப்பட்டோர்கள் அமைப்பினரால் இன்று காணி உறுதிகள் பிரதேச செயலாளரிடம் சமர்ப்பிக்கப்பட்டதன் பின்பு அறிக்கையை தாமதமின்றி தயாரிப்பதாக பிரதேச செயலாளர் தெரிவித்துள்ளார்.