நாட்டில் ஐந்து மாகாணங்களில் கடும் வரட்சி நிலவுகின்ற நிலையில் பல்லாயிரக் கணக்கான மக்கள் இதனால் நீரின்றி பாதிக்கப்பட்டுள்ளதாக அனர்த்த முகாமைத்துவ மத்திய நிலையம் தெரிவித்துள்ளது.
இவற்றில் வட மத்திய மாகாணமே அதிகளவில் வரட்சியினால் பாதிக்கப்பட்டுள்ளதாவும் குறிப்பாக பொலனறுவை மாவட்டத்தில் மாத்திரம் சுமார் 34 ஆயிரம் பேர் குடிநீரின்றித் தவிப்பதாகவும் தெரிவிக்கப்படுகிறது.
மொனராகல, அம்பாறை, வவுனியா, மட்டக்களப்பு, திருகோணமலை, புத்தளம், அநுராதபுரம் மற்றும் ஹம்பாந்தோட்டை ஆகிய மாவட்டங்களில் வாழும் பல்லாயிரக் கணக்கான மக்கள் இவ் வரட்சி காரணமாக குடிநீர் தட்டுப்பாட்டை எதிர்கொண்டுள்ளனர்.
பொலனறுவை மாவட்டத்தில் சிறிய நீர் நிலைகள் கூட வற்றியுள்ளதால் பொது மக்கள் நீருக்கு பெரும் நெருக்கடியை எதிர்நோக்குவதாக பொலனறுவை மாவட்ட அனர்த்த முகாமைத்துவ உதவிப் பணிப்பாளர் உபுல் நாணயக்கார தெரிவித்துள்ளார்.
இப் பகுதிகளில் வாழும் மக்களுக்கு சுமார் 50 முதல் 100 லீற்றர் தண்ணீர் தேவைப்படுகின்ற போதிலும் ஒரு குடம் அல்லது ஒரு வாளி அளவிலேயே பவுசர்கள் மூலம் தண்ணீர் விநியோகிக்கப்படுவதாக மக்கள் கவலை தெரிவிக்கின்றனர்.
இதேவேளை ஹம்பாந்தோட்டை மாவட்டத்தில் சுமார் 8000 குடும்பங்கள் பாதிக்கப்பட்டுள்ளன. இதனால் மக்கள் நீரின்றி தவிப்பதுடன் விவசாய நிலங்கள் கடுமையான பாதிப்பைச் சந்தித்துள்ளன.
அம்பாறை மாவட்டத்தில் சுமார் 13 ஆயிரம் குடும்பங்கள் குடிநீர் தட்டுப்பாட்டை எதிர்கொண்டுள்ளதாக மாவட்ட செயலாளர் நீல் டி அல்விஸ் குறிப்பிட்டுள்ளார்.
வரட்சியினால் திருகோணமலை மாவட்டமும் பாதிக்கப்பட்டுள்ளது.
நாட்டில் சுமார் 10 முதல் 20 வீதமான மழை வீழ்ச்சி குன்றியுள்ளதாலும் 1.2 பாகை வெப்ப நிலை உயர்ந்துள்ளதாலும் வரட்சி நிலை ஏற்பட்டுள்ளதாக வளிமண்டலவியல் திணைக்களம் தெரிவித்துள்ளது.
இதற்கிடையில், நாட்டின் பல மாவட்டங்களில் தற்போது நிலவிவரும் வரட்சிக் காலநிலை இன்னும் ஒரு வாரத்திற்கு நீடிக்கும் என வளிமண்டலவியல் திணைக்களம் அறிவித்துள்ளது.
இதேவேளை தேசிய நீர் வழங்கல் வடிகாலமைப்புச் சபையும் பொது மக்களுக்கான நீர் விநியோகத்தில் நெருக்கடியை எதிர்நோக்கியுள்ளதாக தெரிவித்துள்ளதுடன் நீரைச் சிக்கனமாக பயன்படுத்துமாறும் பொது மக்களை கேட்டுள்ளது.