நாட்டில் மீண்டும் ஒரு யுத்தம் ஏற்படாத வகையில் எல்லா இனங்களையும் திருப்திப்படுத்தும் இலக்கோடு தேசிய ஒருமைப்பாட்டிற்கும் நல்லிணக்கத்துக்குமான அமைச்சு பல திட்டங்களை வடிவமைத்துள்ளது.
இத்திட்டங்கள் அடுத்த வருடம் ஜனவரி மாதம் முதல் அமுல் நடாத்தப்படும் என தேசிய ஒருமைப்பாட்டிற்கும் நல்லிணக்கத்திற்குமான இராஜாங்க அமைச்சர் ஏ.எச்.எம். பௌசி தெரிவித்தார்.
தேசிய ஒருமைப்பாட்டினையும் நல்லிணக்கத்தையும் இலங்கையில் பலப்படுத்துவதற்காக ஐரோப்பிய ஒன்றியத்துடன் நடாத்தப்பட்ட கலந்துரையாடல் தொடர்பாக கருத்து தெரிவிக்கையிலேயே இராஜாங்க அமைச்சர் இவ்வாறு கூறினார். அவர் தொடர்ந்தும் கருத்துத் தெரிவிக்கையில்,
‘இனங்களுக்கிடையில் சமத்துவம் பேணப்படாமையினாலேயே இலங்கையில் யுத்தம் ஒன்று ஏற்பட்டது. இதனால் ஆயிரக்கணக்கானோர் கொல்லப்பட்டனர். பெரும் அழிவுகள் ஏற்பட்டன.
எனவே இவ்வாறான கொடிய யுத்தமொன்று மீண்டும் நாட்டில் ஏற்படாதிருக்க இனங்களுக்கிடையில் நல்லிணக்கம் கட்டியெழுப்பப்பட வேண்டுமென்பது கலந்துரையாடலில் உறுதிசெய்யப்பட்டது.
நாட்டு மக்கள் அனைவராலும் ஏற்றுக் கொள்ளப்பட்ட பலமிக்கதும் உறுதியானதும் முன்னேற்றமானதுமான நாடொன்றினைக் கட்டியெழுப்புவதே அரசாங்கத்தின் திட்டம் என்பது ஐரோப்பிய ஒன்றியத்தின் பிரதிநிதிகளிடம் தெளிவுபடுத்தப்பட்டது.
நாட்டின் ஒவ்வொரு பிரசையும் தனது பொருளாதார சமூக கலாசார மற்றும் அரசியல் ரீதியாக சமமான சந்தர்ப்பத்தினைப் பெற்றுக் கொள்வதற்கு ஏற்றவகையில் திட்டங்கள் செயற்படுத்தப்படவுள்ளன. என்றும் தெரிவிக்கப்பட்டது.
அமைச்சின் திட்டங்களுக்கு ஐரோப்பிய ஒன்றியம் பிரித்தானிய கவுன்ஸில் மற்றும் ஜேர்மனி GIZ என்பன 13. 4 மில்லியன் யூரோ நிதியினை ஒதுக்கியுள்ளது.
வடிவமைக்கப்பட்டுள்ள திட்டங்களை அத்திட்டங்களுடன் சம்பந்தபட்ட அமைச்சுகள் ஆய்வு செய்வதுடன் கண்காணிப்பு பணிகளையும் மேற்கொள்ளவுள்ளன.
அனைத்து இனத்தினதும் அடிப்படை உரிமைகள் மதிக்கப்படும். அதற்கான சட்டவிதிகள், சமத்துவம் மற்றும் பன்மைத்துவம் பாதுகாக்கப்படும்.
சகல பிரஜைகளும் தமது இனம், சமயம், மொழி, சாதி, வயது, பால், பாலினம், பிறப்பிடம் மற்றும் அரசியல் கொள்கைகள் என்பவற்றினால் வேற்றுமைப்படாது கௌரவமாக வாழ்வதற்குத் தேவையான சமூகம் ஒன்று கட்டியெழுப்பப்படும்.
ஐரோப்பிய ஒன்றியத்தின் பிரதிநிதிகள் அமைச்சின் செயற்திட்டங்களைப் பாராட்டியதுடன் இதற்கான சகல ஒத்துழைப்புகளையும் வழங்குவதாக உறுதியளித்துள்ளனர் என்றார்.