ஸ்ரீ லங்கா சுதந்திரக் கட்சியில் பஷில் ராஜபக்ஷவிற்கு முன்னுரிமை வழங்கக் கூடாது. பஷில்தான் எமது தோல்விக்கு மூல காரணம் எனத் தெரிவித்துள்ள அமைச்சர் ஜோன் செனவிரத்ன, கோத்தபாய ராஜபக்ஷவிற்கு இரண்டாம் தர பதவி வழங்கக்கூறவில்லை.
மாறாக இரண்டாம் தரவரிசையில் இடம்கொடுக்க வேண்டுமென்றே வலியுறுத்தினேன் என்றும் அமைச்சர் குறிப்பிட்டார்.
இது தொடர்பாக தொழில் மற்றும் தொழில் உறவுகள் அமைச்சர் ஜோன் செனவிரட்ண மேலும் தெரிவித்திருப்பதாவது,
ஸ்ரீ லங்கா சுதந்திரக் கட்சித் தலைமையை 2020 ஆம் ஆண்டில் ஆட்சியில் அமர்த்த வேண்டுமென்பதே எனது இலக்காகும். அதற்காக கட்சியை வெற்றிபெறும் கட்சியாக கட்டியெழுப்ப வேண்டியது அத்தியாவசியமாகும்.
இதற்கமைய அண்மையில் கோத்தாபய ராஜபக்ஷவுடன் பேச்சுவார்த்தைகளை நடத்தினேன்.
அதன்போது “சுதந்திரக் கட்சி பிளவுபடுவதை நான் விரும்பவில்லை, என்றும் கட்சியின் முன்னேற்றத்திற்காக தனது கடமையை செய்ய தயாராக இருப்பதாகவும் ” என்னிடம் கூறினார். இதனை நான் ஜனாதிபதிக்கும் தெரியப்படுத்தினேன்.
கட்சியை முன்னேற்றுவது தொடர்பில் மஹிந்த ராஜபக்ஷ பங்களிப்பு வழங்குவார் என்ற நம்பிக்கை இன்று இல்லாமல் போய்விட்டது. அவர் மீது நம்பிக்கை வைத்திருந்தேன். ஆனால் இன்று அவரது செயற்பாடுகள் திருப்பதியளிக்கவில்லை.
எனவேதான் கோதாபாயவுடன் பேசினேன். இதற்கு கட்சிக்குள் இருக்கும் ராஜபக்ஷ எதிராளிகள் எதிர்க்கலாம். ஆனால் அது தொடர்பில் பின்னர் சிந்திக்கலாம் என்றார்.