மணிலாவில் அமைந்துள்ள பிலிப்பைன்ஸ் விளையாட்டரங்கில் நடைபெறும் ஆசிய 5 நாடுகள் முதலாம் பிரிவு றக்பி (ஆசிய வல்லவர்) இறுதி ஆட்டத்தில் பிலிப்பைன்ஸை எதிர்த்தாடுவதற்கு இலங்கை தகுதிபெற்றுள்ளது.
இதற்கு முன்னோடியாக நேற்று நடைபெற்ற முதலாவது அரை இறுதிப் போட்டியில் கஸகஸ்தானை எதிர்கொண்ட இலங்கை அணி 35 (3 கோல்கள், 1 ட்ரை, 3 பெனல்டிகள்) க்கு 14 (2 கோல்கள்) என்ற புள்ளிகள் அடிப்படையில் அபார வெற்றிபெற்றது. இலங்கை சார்பாக தனுஷ்க ரஞ்சன் 2 ட்ரைகளையும் துலாஜ் அச்சல பெரேரா, லவங்க பெரேரா ஆகியோர் தலா ஒரு ட்ரையையும் வைத்தனர்.
இவற்றில் 3 ட்ரைகளுக்கான மேலதிகப் புள்ளிகளை ரீஸா முபாரக், கான்ச்சன ராமநாயக்க ஆகியோர் பெற்றுக்கொடுத்தனர். அத்துடன் துலாஜ் பெரேரா, ரீஸா முபாரக், கான்ச்சன ராமநாயக்க ஆகியோர் தலா ஒரு பெனால்டியை இலக்கு தவறாமல் உதைத்தனர்.
இவர்களை விட நேற்றைய போட்டியில் இலங்கை அணியில் ஹென்றி டெரன்ஸ், கிஷோர் ஜெஹான், சோன் விஜேசிங்க, சுஹிரு அன்தனி, ஷாரோ பெர்னாண்டோ, புவனேக்க உதங்கமுவ, ரொஷான் வீரரட்ன, அணித் தலைவர் ஃபாஸில் மரிஜா, சந்துன் ஹேரத், டிமித்ரி ஷெஹான் ஆகியோரும் இடம்பெற்றனர்.
இதேவேளை நேற்று நடைபெற்ற மிகவும் இறுக்கமான இரண்டாவது அரை இறுதியில் 20 க்கு 17 என்ற புள்ளிகள் கணக்கில் சிங்கப்பூரை பிலிப்பைன்ஸ் வெற்றி
கொண்டது. இலங்கைக்கும் பிலிப் பைன்ஸுக்கும் இடையிலான இறுதி ஆட்டம் எதிர்வரும் 9ஆம் திகதி நடைபெறவுள்ளது.