பாகிஸ்தான் கிரிக்கெட் அணியின் அதிரடி சகலதுறை ஆட்டக்காரரான அப்ரிடி 2010ஆம் ஆண்டு டெஸ்டிலும், இரு மாதங்களுக்கு முன்பு ஒரு நாள் போட்டியில் இருந்தும் ஓய்வு பெற்றார். இப்போது 20 ஓவர் அணிக்கு தலைவராக இருந்து இருபது ஓவர் கிரிக்கெட்டில் மட்டும் விளையாடி வருகிறார். இந்த நிலையில் அப்ரிடி அடுத்த ஆண்டுடன் 20 ஓவர் கிரிக்கெட்டுக்கும் முழுக்கு போட முடிவு செய்துள்ளார்.
இது தொடர்பாக அப்ரிடி கூறுகையில், அடுத்த ஆண்டு நடக்கும் 20 ஓவர் உலகக் கிண்ணக் கிரிக்கெட் போட்டியுடன் 20 ஓவர் போட்டியில் இருந்தும் ஓய்வு பெற்று விட்டு விடுவேன். இத்துடன் எனது சர்வதேச கிரிக்கெட் வாழ்க்கை நிறைவு பெற்று விடும். ஆனாலும் இங்கிலாந்தில் கழகப் போட்டியிலும் இன்னும் சில 20 ஓவர் கிரிக்கெட் லீக் போட்டிகளிலும் தொடர்ந்து விளையாடுவேன். எனது கிரிக்கெட் வாழ்க்கையை மறக்க முடியாத நினைவுகளுடன் முடிக்க விரும்புகிறேன் என்றார்.
6ஆவது 20 ஓவர் உலகக் கிண்ணப் போட்டி இந்தியாவில் அடுத்த ஆண்டு (2016) மார்ச்–ஏப்ரல் மாதங்களில் நடைபெற இருப்பது குறிப்பிடத்தக்கது.