முஸ்லிம் தனியார் சட்டத்தில் மேற்கொள்ளப்பட வேண்டிய திருத்தங்கள் உலமாக்கள், புத்திஜீவிகள், சட்டத்தரணிகள், நீதிபதிகள், அரசியல் பிரமுகர்கள் மற்றும் முஸ்லிம் பெண் பிரதிநிதிகள் உள்ளடங்கலாக அனைத்துத்தரப்பினருடனான கலந்துரையாடல்களின் பின்பே மேற்கொள்ளப்பட்டுள்ளன எனவும் திருத்தங்கள் அடங்கிய சிபாரிசுகள் இம்மாத இறுதியில் நீதியமைச்சர் விஜயதாஸ ராஜபக் ஷவிடம் கையளிக்கப்படவுள்ளதாகவும் முஸ்லிம் தனியார் சட்டத்தில் திருத்தங்களைச் செய்வதற்கு 2009ம் ஆண்டு நியமிக்கப்பட்ட குழுவின் தலைவர் ஓய்வுபெற்ற முன்னாள் உயர் நீதிமன்ற நீதியரசர் சலீம் மர்சூப் தெரிவித்தார்.
தனது தலைமையில் நியமிக்கப்பட்டுள்ள குழு எதிர்வரும் 6 ஆம் திகதி இறுதியாகக்கூடி திருத்தங்களை மீண்டும் உறுதி செய்து கொள்ளவுள்ளதாகவும் அவர் கூறினார்.
முஸ்லிம் தனியார் சட்டத்தில் மேற்கொள்ளப்படவுள்ள திருத்தங்கள் தொடர்பில் வினவியபோதே அவர் இவ்வாறு தெரிவித்தார். தொடர்ந்தும் அவர் கருத்து தெரிவிக்கையில், புதிய திருத்தங்கள் ஷரீஆவுக்கு அமைவாக சமூகத்தின் நலன்கருதி பரிந்துரை செய்யப்படவுள்ளது.
6ஆம் திகதி நடைபெறவுள்ள குழுவின் இறுதிக்கூட்டத்தில் இத்திருத்தங்களை சிபார்சு செய்வதற்கு பெரும்பான்மை ஆதரவு பெற்றுக் கொள்ளப்படவுள்ளது.
முஸ்லிம் தனியார் சட்டத்தில் திருத்தங்களைச் செய்வதற்கு அரசாங்கம் அமைச்சரவை உபகுழுவொன்றினையும் நியமித்துள்ளது. இது தொடர்பிலும் கலந்துரையாடப்படவுள்ளது.
முஸ்லிம் தனியார் சட்டத்தில் திருத்தங்கள் கொண்டு வரப்படவேண்டுமென்ற கோரிக்கை நீண்ட காலமாக முன்வைக்கப்பட்டதையடுத்தே 2009ம் ஆண்டு அப்போதைய நீதியமைச்சரினால் இக்குழு நியமிக்கப்பட்டது.
இக்குழு, முஸ்லிம் விவாக, விவாகரத்துச்சட்டத்தில் (தனியார் சட்டம்) மேற்கொள்ளவேண்டிய திருத்தங்களை சட்ட வரைவாக தயாரித்துள்ளது என்றார்.
இதேவேளை முஸ்லிம் தனியார் சட்டத்தில் திருத்தங்களை அகில இலங்கை ஜம்இய்யத்துல் உலமாசபை வரவேற்றுள்ளதுடன் மேற்கொள்ளப்படும் திருத்தங்கள் குர்ஆன், ஹதீஸுக்கு அமைவாக அமையவேண்டுமென அகில இலங்கை ஜம்இய்யத்துல் உலமா சபையின் தலைவர் அஷ்ஷெய்க் எம்.ஐ.எம்.ரிஸ்வி முப்தி கருத்து வெளியிட்டுள்ளார்.
2009ம் ஆண்டு ஓய்வு பெற்ற முன்னாள் உயர் நீதிமன்ற நீதியரசர் சலீம் மர்சூபின் தலைமையில் நியமிக்கப்பட்டுள்ள முஸ்லிம் தனியார் சட்டத்திருத்தங்களுக்கான குழுவில் அகில இலங்கை ஜம்இய்யத்துல் உலமா சபையும் அங்கம் வகிக்கின்றமை குறிப்பிடத்தக்கது.