சிறிலங்கா சுதந்திர கட்சி முன்மொழிந்துள்ள புதிய தேர்தல் முறைமையில் எந்தவொரு பிரதேசத்திற்கோ அல்லது இனத்துக்கோ அநீதி ஏற்படாது. தற்போதுள்ள தேர்தல் முறையில் புத்தி ஜீவிகளை விட பணம் படைத்தவர்களே தேர்ந்தெடுக்கப்படுகின்றனர் என முன்னாள் அமைச்சரும் சிறிலங்கா சுதந்திரக்கட்சியின் தேசிய அமைப்பாளருமான சுசில் பிரேம்ஜயந்த தெரிவித்தார்.
அகில இலங்கை முஸ்லிம் லீக் வாலிப முன்னணியின் சம்மேளனம் ஏற்பாடு செய்திருந்த ஸ்தாபகர் தி நிகழ்வு கடந்த செவ்வாய்க்கிழமை கொழும்பு தபால் நிலைய தலைமைக்காரியாலய கேட்போர் கூடத்தில் இடம்பெற்றது. நிகழ்வில் பிரதம பேச்சாளராக கலந்து கொண்டு உரையாற்றுகையிலேயே அவர் இவ்வாறு தெரிவித்தார்.
அவர் அங்கு தொடர்ந்து உரையாற்றுகையில்,
நாட்டில் தற்போது புதிய தேர்தல் முறைமை பற்றி அதிகமாக பேசப்பட்டு வருகின்றது. புதிய தேர்தல் முறையொன்றின் அவசியம் குறித்து சுதந்திரக்கட்சியே ஆரம்பமாக பிரேரணையொன்றை கொண்டு வந்தது.
மூவின மக்கள் வாழக்கூடிய இந்த நாட்டில் 1978 ஆம் ஆண்டு முதல் விகிதாசார தேர்தல் முறையிலேயே பாராளுமன்றத்துக்கு மக்கள் பிரதிநிதிகள் தேர்ந்தெடுக்கப்படுகின்றனர்.
கடந்த 30 வருடங்களாக இந்த நாட்டில் நடைபெற்ற யுத்தம் காரணமாக மக்கள் தங்களது சொந்த இடங்களை விட்டு நாட்டின் பல பிரதேசங்களிலும் இடம்பெயர்ந்து வாழ்கின்றனர். இதனால் சில தேர்தல் தொகுதிகளில் மக்கள் தொகை குறைவாக காணப்படுகின்றது. இதன் காரணமாக தற்போதைய தேர்தல் முறையில் இந்த பிரதேசங்களில் இருந்து மக்கள் பிரதிநிதிகள் தேர்ந்தெடுக்கப்படாமல் போகும் நிலை உருவாகியுள்ளது.
உதாரணமாக கொழும்பு மாவட்டத்தில் கோட்டே தேர்தல் தொகுதியிலிருந்து 1977ஆம் ஆண்டு ஆனந்த திஸ்ஸ டி அல்விசுக்கு பிறகு இதுவரை எவரும் பாராளுமன்றத்துக்கு தெரிவு செய்யப்படவில்லை.
இவ்வாறு பல பிரதேசங்கள் இருக்கின்றன. ஒவ்வொரு தேர்தல் தொகுதியிலிருந்தும் பொறுப்புக்கூறக்கூடிய மக்கள் பிரதிநிதியொருவர் பாராளுமன்றத்துக்கு தெரிவு செய்யப்பட வேண்டும் என்ற நிலைப்பாடு மக்கள் மத்தியிலும் தற்போது உருவாகியுள்ளது.
அதேபோன்று விருப்பு வாக்குகள் காரணமாக தேர்தல் காலங்களில் கட்சி வேட்பாளர்களுக்கிடையே முரண்பாடுகள் எழுகின்றன. அத்துடன் புத்திஜீவிகள் சமூக சேவையாளர்கள் தேர்தலில் போட்டியிட்டாலும் அவர்களிடம் பணம் இல்லாவிட்டால் அவர்களால் வெற்றி பெறுவது கடினமான காரியமாகும்.
ஆனால் புதிய தேர்தல் முறையில் விகிதாசார ரீதியாகவும் தொகுதி வாரியாகவும் மக்கள் பிரதிநிதிகள் தேர்ந்தெடுக்கப்படக்கூடிய வாய்ப்பு ஏற்படும்.எனவே சிறிலங்கா சுதந்திரக்கட்சி காலத்தின் தேவையை கருத்தில் கொண்டு முன்மொழிந்துள்ள புதிய தேர்தல் முறைமையில் எந்த பிரதேசத்துக்கோ அல்லது இனத்துக்கோ பாதிப்பு ஏற்படாது என்றார்.