நேற்று சிட்னியில் நடைபெற்ற போட்டியில் இந்தியா 331 ரன்களை சேஸிங் செய்து வெற்றி பெற்றது. இந்த வெற்றிக்கு மணீஷ் பாண்டேவின் சதம்தான் முக்கிய காரணமாக இருந்தது.
சிட்னியில் இந்தியா 16 முறை விளையாடியுள்ளது. இதில் 13 முறை தோல்வியடைந்துள்ளது. ஒரு போட்டியில் முடிவு எட்டப்படவில்லை. கடந்த 2008-ம் ஆண்டு சச்சின் அடித்த சதத்தால் இந்தியா வெற்றி பெற்றுள்ளது. அதன்பின் தற்போது பாண்டே சதத்தால் இந்தியா 2-வது வெற்றி பெற்றுள்ளது.
இந்தியாவிற்கு வெற்றி தேடித்தந்த மணீஷ் பாண்டே ஆட்ட நாயகன் விருது பெற்றார். ஆட்ட நாயகன் விருது பெற்ற அவர் சதம் அடித்தது குறித்து கூறும்போது, ‘‘ரகானே காயம் காரணமாக அணியில் இடம்பெறாததால் எனக்கு இந்த போட்டியில் விளையாடும் வாய்ப்பு கிடைத்தது. இந்த தொடர் முழுவதும் நீங்கள் பார்த்தீர்கள் என்றால் ஒவ்வொரு போட்டியிலும் 300 ரன்களுக்கு மேல் அடிக்கப்பட்டுள்ளது. இந்த போட்டியில் அடித்த ரன்னை 6-வது இடத்தில் களம் இறங்கி அடிப்பது கடினம். ஆகவே, தற்போது நான்காவது இடத்தில களம் இறங்குவதை சரியாக பயன்படுத்திக்கொள்ள வேண்டும் என்று நினைத்தேன்’’ என்றார்.
இந்த போட்டியில் பாண்டே அவுட்டாகாமல் 104 ரன்கள் குவித்தார்.