ஏ.எஸ்.எம்.ஜாவித்
வாழ்க்கையின் ஒவ்வொரு நிலைகளிலும் மகிழ்ச்சி பொங்கட்டும்- அமைச்சர் றிஷாட்
இனங்களுக்கிடையில் மகிழ்ச்சி பொங்கிட, பிறந்திருக்கும் தைப்பொங்கல் திருநாளை நாம் மலர்ச்சியுடன் வரவேற்போம் என்று அகில இலங்கை மக்கள் காங்கிரசின் தேசிய தலைவரும் அமைச்சருமான றிசாட் பதியுதீன் தனது தைப்பொங்கல்; வாழ்த்துச் செய்தியில் தெரிவித்துள்ளார்.
அவர் மேலும் தனது வாழ்த்துச் செய்தியில் கூறியுள்ளதாவது, உழவர் திருநாளென்றும் தமிழர் பெருநாளென்றும் எமது சகோதர தமிழினம் இன்றைய பொங்கலை மகிழ்ச்சியோடு கொண்டாடுகின்றது. இந்த சந்தர்ப்பத்தில் பொங்கலை கொண்டாடும் அன்பான தமிழ் மக்களுக்கும், உழவர்களுக்கும் கட்சி ஆதரவாளர்களுக்கும் நான் மனப்பூர்வமான வாழ்த்துக்களை தெரிவிக்கின்றேன்.
போர்ச்சூழலும் உக்கிர வன்முறைகளும் நீங்கி சமாதானச் சூழலில் அமைதியான மனநிலையில் தமிழ்ச் சகோதரர்கள் இன்றைய பொங்கலை உற்சாகத்தோடு கொண்டாடி வருகின்றார்கள். அவர்களுடைய பானைகளிலே அன்னம் பொங்குவது போன்று அவர்களுடைய வாழ்க்கையின் ஒவ்வொரு நிலைகளிலும் மகிழ்;ச்சிப் பிரவாகம் பொங்க வேண்டும் என பிரார்த்திக்கின்றேன்.
இலங்கை மக்கள் அனைவரினதும் வறுமை நீங்கி அவர்களுடைய வாழ்க்கையிலே செழுமை ஏற்பட வேண்டும் என மனதார வேண்டுகின்றேன். தமிழ், சிங்கள முஸ்லிம் என்ற பேதங்களை வளர்த்து இனங்களுக்கிடையில் அமைதியின்மையைத் தோற்று விக்கும் ஒருசில சக்திகளுக்கு இறைவன் நல்ல சிந்தனைகளை ஏற்படுத்த இந்த தைப்பொங்கல் திருநாள் வழிவகுக்க வேண்டும் என விரும்புகின்றேன்.
இன்றைய பொங்கலை திருப்தியோடு கொண்டாடி வரும் தமிழ்ச் சகோதரர்களுக்கும் எனது கட்சி ஆதரவாளர்களுக்கும் மீண்டும் ஒருமுறை எனது இதயபூர்வமான தைப்பொங்கல் நல்வாழ்த்துக்களை தெரிவித்துக் கொள்கிறேன்.