நடந்து முடிந்த பாராளுமன்றத் தேர்தலில் ஐக்கிய தேசியக் கட்சி வெற்றிபெற்றுள்ள நிலையில் தேசிய அரசாங்கம் ஒன்றை அமைப்பது தொடர்பான பேச்சுவார்த்தைகள் இடம்பெற்றுவருவதாகத் தெரிவிக்கப்படுகின்றது.
ஐக்கிய தேசியக் கட்சியும் ஸ்ரீலங்கா சுதந்திரக்கட்சியும் இணைந்து தேசிய அரசாங்கத்தை அமைத்து அமைச்சுப் பதவிகளை பகிர்ந்துகொள்வது தொடர்பிலேயே இரண்டு தரப்புக்களுக்கும் இடையில் கலந்துரையாடல்கள் இடம்பெற்றுவருகின்றன.
அதன்படி ஐக்கிய மக்கள் சுதந்திர முன்னணியிலிருந்து பதுளை மாவட்டத்தில் பாராளுமன்றத்துக்கு தெரிவாகியுள்ள நிமல் சிறிபால டி. சில்வாவுக்கு பிரதி பிரதமர் பதவியை வழங்குவது குறித்து ஆராயப்பட்டுவருகின்றது.
குறிப்பாக சிறிலங்கா சுதந்திரக் கட்சியில் வெற்றிபெற்றுள்ள மைத்திரி ஆதரவாளர்கள் ஐக்கிய தேசிய கட்சியுடன் இணைந்து தேசிய அரசாங்கத்தில் பங்கெடுப்பார்கள் என்றும் எதிர்பார்க்கப்படுகின்றது.
மேலும் தமிழ்த் தேசியக் கூட்டமைப்புக்கும் ஐக்கிய தேசிய கட்சியின் சார்பில் அழைப்பு விடுக்கப்பட்டுள்ளது. அரசாங்கத்தில் இணைந்து அமைச்சுப் பதவிகளை பெறுமாறும் கூட்டமைப்புக்கு அழைப்பு விடுக்கப்பட்டுள்ளது. எனினும் இந்த அழைப்பு உத்தியோகபூர்வமாக விடுக்கப்பட்டுள்ளதா என்பதனை உறுதிபடுத்த முடியவில்லை.
இதேவேளை ஐக்கிய தேசிய கட்சியின் அரசாங்கத்தில் சிறிலங்கா சுதந்திரக் கட்சி இணையுமாயின் அமைச்சுப் பதவிகளை அதிகரித்துக்கொள்வதற்கு 19 ஆவது திருத்தச் சட்டத்தில் இடமுள்ளது. இந்நிலையில் ஐக்கிய தேசிய கட்சியும் சிறிலங்கா சுதந்திரக் கட்சியும் இணைந்து ஆட்சியமைக்கும் பட்சத்தில் இரண்டு தரப்பினருக்கும் தலா 15 அமைச்சுப் பதவிகள் வீதம் வழங்கப்படுவதற்கு ஆலோசிக்கப்பட்டுள்ளது.
அத்துடன் ஐக்கிய தேசிய கட்சிக்கும் சிறிலங்கா சுதந்திரக் கட்சிக்கும் தலா 25 பிரதியமைச்சுப் பதவிகளை வழங்குவது குறித்தும் ஆலோசிக்க்கப்பட்டுவருவதாக தெரிவிக்கப்படுகின்றது.
இது இவ்வாறு இருக்க ஐக்கிய தேசிய கட்சியின் தலைவர் ரணில் விக்ரமசிங்கவும் ஜனாதிபதி மைத்திரிபால சிறிசேனவும் நேற்று முன்தினம் சந்தித்து பேச்சுவார்த்தை நடத்தியுள்ளனர். இதன்போதும் அடுத்த அரசாங்கத்தை அமைப்பது தொடர்பாக விரிவாக பேச்சுவார்த்தை நடத்தப்பட்டுள்ளது.
நடந்து முடிந்த பாராளுமன்றத் தேர்தலில் ஐக்கிய தேசிய கட்சி 106 ஆசனங்களை பெற்றுக்கொண்டது. எனினும் ஆட்சியமைப்பதற்கு 113 ஆசனங்கள் தேவையாகவுள்ளது. எனினும் ஐக்கிய தேசிய கட்சி கூடுதல் ஆசனங்களை பெற்றமையினால் ஆட்சியமைப்பதற்கு 19 ஆவது திருத்தச் சட்டத்தின் ஊடாக முடியும்.
பாராளுமன்றத் தேர்தலில் ஐக்கிய மக்கள் சுதந்திர முன்னணி 95 ஆசனங்களையும் இலங்கை தமிழரசுக் கட்சி 16 ஆசனங்களையும் மக்கள் விடுதலை முன்னணி 6 ஆசனங்களையும் பெற்றன. அத்துடன் ஈழ மக்கள் ஜனநாயக் கட்சியும் சிறிலங்கா முஸ்லிம் காங்கிரஸும் தலா ஆசனத்தை கைப்பற்றின. புதிய அரசாங்கத்தின் பிரதமராக ரணில் விக்ரமசிங்க பதவியேற்கவுள்ளமை குறிப்பிடத்தக்கதாகும்.