இலங்கை – பாகிஸ்தான் அணிகளுக்கிடையில் நேற்றுமுன்தினம் நடைபெற்ற 20 ஓவர்கள் கிரிக்கெட் போட்டியில் இலங்கை அணி தோல்வி கண்டுள்ள நிலையில் இன்று இரண்டாவது போட்டியில் இவ்விரு அணிகளும் மோதுகின்றன.
இலங்கைக்கு சுற்றுப் பயணம் மேற்கொண்டு விளையாடி வரும் பாகிஸ்தான் அணி ஏற்கனவே டெஸ்ட் தொடரையும் ஒருநாள் தொடரையும் கைப்பற்றியது. அந்த வெற்றிக் களிப்பில் நேற்று முன்தினம் 20 ஓவர்கள் தொடரில் பங்கேற்றது. ஏற்கனவே 2 தொடர்களையும் இழந்த நிலையில் இலங்கை அணி 20 ஓவர் தொடரைக் கைப்பற்றும் என்பதுதான் அனைவருடைய எதிர்பார்ப்பாகவும் இருந்தது. ஆனால் இலங்கை அணி ஏமாற்றிவிட்டது.
இந்நிலையில் இந்தத் தோல்விக்கு நானே காரணம் என்று இலங்கை அணியின் 20 ஓவர் கிரிக்கெட்டிற்கான அணித்தலைவர் லசித் மலிங்க தெரிவித்துள்ளார்.
ஆர்.பிரேமதாஸ சர்வதேச கிரிக்கெட் அரங்கில் நடைபெற்ற இந்தப்போட்டியில் முதலில் துடுப்பெடுத்தாடிய பாகிஸ்தான் அணி 175 ஓட்டங்களைச் சேர்த்தது. 176 ஓட்டங்கள் என்ற வெற்றி இலக்கைத் துரத்திய இலங்கை அணி 29 ஓட்டங்களால் தோல்வியைத் தழுவிக்கொண்டது. இதில் இலங்கை அணித்தலைவர் மலிங்க ஓட்டங்களை அள்ளிக் கொடுத்தார். அவர் 4 ஓவர்களில் 1 விக்கெட் மட்டும் எடுத்த நிலையில் 46 ஓட்டங்களை விட்டுக் கொடுத்தார்.
இது பற்றி மலிங்க கூறுகையில், நான் சிறப்பாக பந்து வீசவில்லை. நான் அனுபவ வீரராக இருந்திருந்தால், அதற்கு ஏற்றதை அணிக்கு செய்திருக்க வேண்டும். ஆனால் நான் அதை செய்யவில்லை. அதே சமயம் மற்ற வீரர்களையும் குறைகூற முடியாது. அவர்கள் இளம் வீரர்கள். தற்போது தான் கற்றுக் கொண்டு வருகிறார்கள்.
கப்புகெதர மற்றும் புதுமுக வீரர் சிறிவர்த்தன ஆகியோர்களின் அதிரடி ஆட்டம் மகிழ்ச்சி அளிக்கும் விதமாக இருக்கிறது. இதில் சிறிவர்த்தன போட்டியின் முடிவை தனி ஆளாக மாற்றக் கூடியவர்.
மேலும், அடுத்த போட்டியில் வெற்றி பெற வேண்டும் என்றால் இன்னும் அதிக தாக்கத்தை ஏற்படுத்த வேண்டும் என்று கூறியுள்ளார்.
இன்று ஆர். பிரேமதாஸ மைதானத்தில் இரவு 7 மணிக்கு நடைபெறும் இரண்டாவது 20 ஓவர் போட்டியிலாலாவது இலங்கை வெற்றி பெறுமா என்பதைப் பொறுத்
திருந்து பார்ப் போம்.