எனக்குத் தேசியப்பட்டியல் பாராளுமன்ற உறுப்பினர் பதவி எப்போது வழங்கப்படும் என கட்சியினால் உத்தியோகபூர்வமாக இதுவரை அறிவிக்கப்படவில்லை. ஆனால் கடந்த 16 ஆம் திகதி இதற்கான சகல ஏற்பாடுகளும் பூர்த்தி செய்யப்படும் என கட்சியின் தலைவர் என்னிடம் தெரிவித்திருந்தார் என ஸ்ரீலங்கா முஸ்லிம் காங்கிரஸின் செயலாளர் நாயகம் எம்.ரி.ஹசன் அலி தெரிவித்தார்.
தேசியப் பட்டியலில் பாராளுமன்ற உறுப்பினர் பதவி தொடர்பில் வினவிய போதே அவர் இவ்வாறு கூறினார்.
தொடர்ந்தும் அவர் கருத்து தெரிவிக்கையில், அடுத்த மாதம் 12 ஆம் திகதி நடைபெறவுள்ள கட்சியின் பேராளர் மாநாட்டின் போது எனக்கு தேசிய பட்டியல் பாராளுமன்ற உறுப்பினர் பதவி வழங்கப்படவுள்ளதாக ஊடகங்கள் வாயிலாகவே அறிந்துகொண்டேன். ஆனால் இதுவரை அது தொடர்பாக எனக்கு அறிவிக்கப்படவில்லை.
செயலாளர் நாயகம் ஹசன் அலிக்கு தேசியப்பட்டியல் பாராளுமன்ற உறுப்பினர் பதவி வழங்கப்பட வேண்டுமென்றால் ஸ்ரீலங்கா முஸ்லிம் காங்கிரஸின் தேசிய பட்டியல் பாராளுமன்ற உறுப்பினர் எம்.எச். எம்.சல்மான் தனது பதவியை இராஜினாமா செய்ய வேண்டும். பாராளுமன்ற செயலாளரைத் தொடர்பு கொண்டு வினவிய போது சல்மான் எம்.பி.இதுவரை தனது பதவியை இராஜினாமா செய்யவில்லை எனத் தெரிவித்தார்
விடிவெள்ளி