ஐக்கிய மக்கள் சுதந்திர முன்னணியின் பிரதமர் வேட்பாளராக சமல் ராஜபக் ஷவை நியமிப்பதற்கு ஆலோசிக்கப்பட்டுள்ளதாக வெளியிடப்பட்ட கருத்து முற்றிலும் தவறாகும். கட்சியின் இரகசியங்கள் அனைவருக்கும் தெரியாது. நாட்டு மக்கள் பொறுத்திருந்து பார்க்க வேண்டும். இது குறித்து திங்களன்று உண்மைகள் வெளிவரும் என ஐக் கிய மக்கள் சுதந்திர முன்னணியின் பொதுச் செயலாளர் சுசில் பிரேம்ஜயந்த தெரி வித்தார்.
முன்னாள் ஜனாதிபதி மஹிந்த ராஜபக் ஷ மெதமுலனவில் ஆற்றிய உரைஎமது மனங்களை கவலையுற வைத்துள்ளது என்றும் அவர் குறிப்பிட்டார்.
பாராளுமன்றத் தேர்தல் தொடர்பில் கலந்துரையாடும் நோக்குடன் அனைத்து கட்சிகளின் செயலாளரைகளையும் நேற்று தேர்தல் செயலகத்தில் வைத்து ஆணையாளர் சந்தித்த பின்னர் ஊடகவியலாளர்களின் கேள்விக்கு பதிலளிக்கும் போதே அவர் மேற்கண்டவாறு தெரிவித்தார்.
இது தொடர்பில் அவர் மேலும் அங்கு குறிப்பிடுகையில்,
ஐக்கிய மக்கள் சுதந்திர முன்னணியின் பிரதமர் வேட்பாளராக சமல் ராஜபக்ஷ போட்டியிட போவதாக நேற்று ஸ்ரீலங்கா சுதந்திரக் கட்சியின் தலைமையகத்தில் இடம்பெற்ற ஊடகவியலாளர் மாநாட்டின் போது தெரிவிக்கப்பட்ட கருத்து உண்மைக்கு புறம்பானவையாகும்.
தேர்தலின் போது பிரதமர் வேட்பாளர்கள் எவரும் நியமிக்கப்பட்டவில்லை என்றே ஜனாதிபதியின் ஊடகப்பிரிவு அறிவித்திருந்தது. இந்த நிலையில் எவ்வாறு பிரதமர் வேட்பாளராக முன்னாள் சபாநாயகர் சமல் ராஜபக்ஷவை நியமிப்பதற்கு ஆலோசிக்கப்படுவதாக கூற முடியும்.
ஆகவேஇ ஐக்கிய மக்கள் சுதந்திர முன்னணியின் உள்ளக இரகசியங்கள் எவருக்கும் தெரிவதற்கு வாய்ப்புகள் இல்லை. தற்போது கட்சியின் வேட்புமனு தெரிவுக்குழு கூடியுள்ளது. கட்சியில் நேர்முகப்பரீட்சை தற்போது மும்முரமாக நடைப்பெற்று வருகிறது. எனவே இதன் பின்னணியில் முன்னாள் ஜனாதிபதி எந்தக் கட்சியில் போட்டியிடுவார் என்பது வெகுவிரைவில் தெரியவரும்.
ஐக்கிய மக்கள் சுதந்திர முன்னணியின் வேட்புமனு குறித்து ஜனாதிபதி மைத்திரிபால சிறிசேனவிற்கும் முன்னாள் ஜனாதிபதி மஹிந்த ராஜபக்ஷவிற்கும் இடையிலான பேச்சுவார்த்தைகள் மிகவும் சாதகமாக நிறைவுப் பெற்றுள்ளன. கட்சியின் ஒற்றுமை குழுவின் அறிக்கையும் தற்போது ஜனாதிபதி மைத்திரிபால சிறிசேனவின் கைகளில் ஒப்படைக்கப்பட்டுள்ளது.
எனவே முன்னாள் ஜனாதிபதி மஹிந்த ராஜபக்ஷ எந்த கட்சியில் போட்டியிடுவார் என்பதனையும் இஎன்னுடைய நிலைப்பாடு என்ன என்பதனையும் நீங்கள் அடுத்த திங்கட்கிழமையன்றோ அல்லது செவ்வாய்கிழமையன்றோ அறிந்துக் கொள்வீர்கள்.
மேலும் முன்னாள் ஜனாதிபதி மஹிந்த ராஜபக்ஷ நேற்று மெதமுலனவில் உள்ள அவரது வாசஸ்தல வளாகத்தில் ஆற்றிய உரை எமக்கு மிகவும் ஆறுதலையும் வருத்ததையும் தந்துள்ளது. எனவே அந்த வார்த்தைகளின் பிரதிபலனை நாட்டு மக்கள் விரைவில் கண்டுக்கொள்வார்கள். அத்தோடு பாராளுமன்ற தேர்தல் நீதியானதும் நியாயமானதுமாக நடத்தப்பட வேண்டும். எனவே நீதியான தேர்தலுக்கு ஐக்கிய மக்கள் சுதந்திர முன்னணி ஒத்தாசையாக இருக்கும் என்றார்.