புதிதாக நிர்மாணிக்கப்படும் மத தலங்களுக்கு புத்தசாசன மற்றும் மத விவகார அமைச்சிடம் அனுமதி பெறப்பட வேண்டும் என 2008.10.16 அன்று வெளியிடப்பட்ட சுற்று நிருபம், பௌத்த மத தலங்களுக்கு மாத்திரமே செல்லுபடியாகும் எனவும் ஏனைய மத தலங்களை நிர்மாணிப்பதற்கு புத்தசாசன அமைச்சின் அனுமதி பெற்றப்பட வேண்டிய அவசியமில்லை என்றும் குறித்த அமைச்சு உறுதிப்படுத்தியுள்ளது.
மேற்படி சுற்று நிருபத்தை பௌத்த சமயம் தவிர்ந்த ஏனைய சமயங்களும் பின்பற்ற வேண்டுமா என விளக்கமளிக்குமாறு கோரி, முஸ்லிம் கவுன்சில் அமைப்பின் உப தலைவர் ஹில்மி அகமட் தகவல் அறியும் உரிமைச் சட்டத்தின் கீழ் மேற்கொண்ட விண்ணப்பத்திற்கே, புத்தசாசன அமைச்சின் செயலாளர் சந்திரபெரும கமகே இவ்வாறு பதிலளித்துள்ளார்.
இதேவேளை இந்து, கிறிஸ்தவ மற்றும் இஸ்லாமிய சமய தலங்கள் வெவ்வேறு அமைச்சுக்களின் கீழ் பதியப்படும் நிலையில் அவற்றையும் புத்தசாசன அமைச்சின் கீழ் சட்ட ரீதியாக பதியப்பட வேண்டிய அவசியம் உள்ளதா என மேற்கொள்ளப்பட்ட விண்ணப்பத்திற்கும் பௌத்த மத தலங்கள் மாத்திரமே புத்தசாசன அமைச்சின் கீழ் பதியப்பட வேண்டும் எனவும் அமைச்சின் செயலாளர் மேலும் பதிலளித்துள்ளார்.
அத்துடன் புதிய மத தலங்களை நிர்மாணிப்பது தொடர்பில் 2008.10.16 அன்று வெளியிடப்பட்ட குறித்த சுற்றுநிருபமானது தொடர்ந்தும் பௌத்த மத தலங்களுக்கு பொருந்தும் என்றும் புத்தசாசன அமைச்சின் செயலாளர் சந்திரபெரும கமகே மேலும் சுட்டிக்காட்டியுள்ளார். -Vidivelli