புனித ரமழான் மாதத்தை முன்னிட்டு சவூதி அரேபியா உள்ளிட்ட மத்திய கிழக்கு நாடுகளினால் இலங்கைக்கு அன்பளிப்பாக வழங்கப்படும் பேரீச்சம் பழத்திற்கான இறக்குமதி வரியை நீக்குவது குறித்ததான பேச்சுவார்த்தையொன்று முஸ்லிம் சமய விவகார, தபால் மற்றும் தபால் சேவைகள் அமைச்சர் எம்.எச். ஏ.ஹலீம் மற்றும் நிதி அமைச்சர் ரவி கருணாநாயக்கவுக்கிடையே இடம்பெறவுள்ளது.
இது தொடர்பில் அமைச்சர் ஹலீம் விடிவெள்ளிக்கு தெரிவிக்கையில்,
சவூதி அரேபியாவினால் அன்பளிப்பு செய்யப்பட்ட பேரீச்சம் பழம் இன்றைய தினம் முஸ்லிம் சமய விவகார அமைச்சினால் பொறுப்பேற்கப்படவுள்ளது. சுமார் 200 தொன் பேரீச்சம் இவ்வாறு இறக்குமதி செய்யப்பட்டுள்ளது.
அதற்காக இறக்குமதி வரி செலுத்தவேண்டியுள்ளது. ஏற்கனவே எமது அமைச்சுக்கு நிதி ஒதுக்கீட்டில் குறைந்த அளவிளான தொகையே ஒதுக்கப்பட்டது. இந்நிலையில் அன்பளிப்பு பேரீச்சம் பழத்தை சுங்க வரியின்றி இறக்குமதி செய்வது குறித்து நிதி அமைச்சருடன் பேச்சுவார்த்தை நடத்தவுள்ளேன்.
இது தொடர்பாக அவருடன் தொலைபேசியூடாக கதைத்துள்ளேன். விரைவில் இருவரும் நேரில் சந்தித்து இது குறித்து பேசவுள்ளோம்.
இதேவேளை, இம்முறை சவூதி அரசு 200 தொன் பேரீச்சம் பழத்தையே அன்பளிப்பாக தந்துள்ளது. கடந்த வருடம் 250 தொன் பேரீச்சம் பழம் கிடைக்கப்பெற்றது. இவை இலங்கை முஸ்லிம்களுக்கு பகிர்ந்தளிக்க போதுமானதாக இல்லை.
எனவே, எமக்கான பேரீச்சம் பழத்தை அதிகரித்து தருமாறு சவூதியிடம் கோரிக்கை விடுத்துள்ளோம்.
அத்துடன் குவைட், ஐக்கிய அரபு இராச்சியம் போன்ற நாடுகளுடனும் பேச்சுவார்த்தை நடத்தியிருக்கிறோம்.
அந்நாடுகளிலிருந்து பெருந்தொகை பேரீச்சம் பழம் கிடைக்கும் என எதிர்பார்க்கிறோம் என்றார்.